Rusiya paytaxtında virtuoz skripka ifaçısı Elvin Xoca Qəniyevin konserti keçiriləcək

2024

Rusiya paytaxtında virtuoz skripka ifaçısı Elvin Xoca Qəniyevin konserti keçiriləcək

Fevralın 2-də Rusiya paytaxtı Moskvada virtuoz skripka ifaçısı, Azərbaycanın əməkdar artisti Elvin Xoca Qəniyevin konserti keçiriləcək.

Moskvanın “Zaryadye” konsert salonunda ilk dəfə çıxış edəcək tanınmış azərbaycanlı musiqiçini P.Çaykovski adına Dövlət Akademik Böyük Simfonik Orkestri müşayiət edəcək. Dirijor Marius Stravinskinin idarə edəcəyi konsertdə görkəmli türk bəstəkarı Kamal Ülvi Erkinin skripka üçün konserti və amerikalı bəstəkar Frans Vaksman Bizenin “Karmen” operası mövzularında “Fantaziya”sı səsləndiriləcək.

1997-ci ildə musiqiçi ailəsində anadan olan Elvin Xoca Qəniyev 5 yaşından skripka çalmağa başlayıb. Onun ilk ustadı babası – Azərbaycanın xalq artisti, məşhur skripkaçı və dirijor Sərvər Qəniyev olub. Altı yaşında Bilkənd Universiteti nəzdində xüsusi musiqi məktəbinə daxil olub, səkkiz yaşında babası – Azərbaycanın xalq artisti, skripkaçı və dirijor Sərvər Qəniyevlə birlikdə ilk konsertini verib. Həmin il adı İsveçrənin Sürix Konservatoriyasının “Gənc sənətçi” proqramına daxil edilib. 10 yaşında Vladimir Spivakovun rəhbərliyi ilə “Moskva virtuozları” ilə birlikdə Kreml Sarayında ilk konsertini təqdim edib.

Prezident İlham Əliyevin 2008-ci ilin yanvar ayında imzaladığı müvafiq Sərəncamla Elvin Qəniyevin adı Azərbaycanın gənc istedadlarının “Qızıl kitabı”na daxil edilib və ona Prezident təqaüdü təyin olunub. Sonradan professor Zaxar Brondan dərs alan Elvinin konsertmeysteri anası Nərminə Qəniyevadır.

Elvin Xoca Qəniyev Madriddə Reina Sofia İncəsənət Mərkəzinin Ali Musiqi Məktəbini bitirib, hazırda Almaniyada Hannover Musiqi, Teatr və Media Universitetində təhsilini davam etdirir. O, musiqiçi kimi Azərbaycanı dünyanın müxtəlif ölkələrində, o cümlədən Böyük Britaniya və Avstriyada təmsil edib.

K.Lipinski, Q.Venyavski, P.İ.Çaykovski, D.Oystrax adına müsabiqələrin və digər nüfuzlu beynəlxalq yarışlarının laureatıdır. 2019-cü ildə Türkiyənin “Aydın Gün Təşviq Mükafatı”na layiq görülüb. Həmin il Florida Azərbaycan Mədəniyyət Assosiasiyasının mədəniyyət məsələləri üzrə direktoru Pərvin Muradovun məşhur layihəsi olan “Florida Keys” müsabiqəsinin Qran-pri mükafatını alıb. Pərvin Muradovla əməkdaşlıq çərçivəsində təşkilatın “Musiqi təhsili və autizm” layihəsinin siması, sözçüsü və sponsoru olub. Həmin layihənin iştirakçılarından biri, daun sindromlu skripka ifaçısı bundan sonra Vatikana dəvət alaraq Roma papasının qarşısında çıxış edib və diplomla mükafatlandırılıb.

FOTO QALEREYA

dostların arasında bunu ilk tövsiyyə edən sən ol

DIGƏR XƏBƏRLƏR

kaynak:https://diaspor.gov.az/az/news-detail/rusiya-paytaxtinda-virtuoz-skripka-ifacisi-elvin-xoca-qeniyevin-konserti-kecirilecek-4146